Քահանաները
Տեր Մխիթար քահանա Ալոյան
Տեր Մխիթար (ավազանի անունը՝ Օնիկ) քահանա Ալոյանը ծնվել է 1956թ. հունվարի 29-ին Արտաշատի շրջանի Նորաշեն գյուղում:
1969 թ. տեղի միջնակարգ դպրոցի 7-րդ դասարանն ավարտելուց հետո ընդունվել է Մայր Աթոռ Սուրբ Էջմիածնի Գևորգյան Հոգևոր ճեմարան:
1974-1976 թթ. ծառայել է խորհրդային բանակում: Զորացրումից հետո աշխատել է շինարարական կազմակերպությունում՝ որպես բանվոր, այնուհետև՝ գինեգործարանում, մանրահատակի գործարանում, նաև խանութում՝ որպես վաճառող:
1978-1989 թթ. աշխատել է ՆԳ-ում՝ նախ որպես շարքային ծառայող, այնուհետև՝ Արտաշատի ՆԳ-ում՝ որպես շարքային անձնակազմի ավագ:
1989 թ. ծառայության է անցել Արարատի մարզի Ս. Հակոբ եկեղեցում՝ որպես ուրարակիր:
1990 թ. Ուրուգվայի հայոց թեմի առաջնորդի հրավերով մեկնել է Ուրուգվայ և սարկավագ ձեռնադրվել Մոնտեվիդեո քաղաքի Ս. Ներսես Շնորհալի եկեղեցում:
Վերադառնալով Հայաստան՝ 1991թ. մարտի 16-ին ձեռամբ Տեր Արսեն արքեպիսկոպոս Բերբերյանի ձեռնադրվել է քահանա և ծառայել Գոշավանքում, ապա՝ Հաղպատ և Հաղարծին վանքերում՝ որպես վանահայր, նաև Դիլիջան քաղաքում՝ որպես հոգևոր հովիվ: Տեր Արսեն արքեպիսկոպոս Բերբերյանի ԱՄՆ մեկնելուց հետո նշանակվել է Գուգարաց թեմի առաջնորդական փոխանորդ:
1995 թ. նոյեմբերին տեղափոխվել է Արարատի մարզ և ծառայության անցել Մրգավանի Ս. Հակոբ եկեղեցում՝ որպես ծիսակատար քահանա:
2001թ. փետրվարին կրկին մեկնել է Ուրուգվայ և ծառայել Ս. Ներսես Շնորհալի եկեղեցում, այնուհետև վերադարձել է Հայաստան: Ծառայության է անցել Արարատի մարզի Մրգավան գյուղի Ս. Հակոբ եկեղեցում: Ներկայումս ծառայում է Արարատի մարզի Վերին Արտաշատ գյուղի Ս. Աստվածածին եկեղեցում՝ որպես հոգևոր հովիվ: Ամուսնացած է, ունի 3 զավակ:
